შაბ, 03 დეკემბერი
შაბ, 03 დეკემბერი
ახალი ამბები:
ENG
12.01.2016 | 13:23

სახელმწიფო ტბებს ელექტრონული აუქციონის საშუალებით გაასხვისებს

კატეგორია: ეკონომიკა
სახელმწიფო ტბების ლიცენზირებას იწყებს. ახალი რეგულაციების მიხედვით, ტბის გასხვისება აუქციონის სახით მოხდება და მას მთავრობა უმეტეს შემთხვევაში 20 წლის ვადით გაასხვისებს.
 
გარემოს ეროვნული სააგენტოს უფროსის მოადგილე, ალექსანდრე დევიძე "ბიზნესკონტაქტთან" საუბრისას აცხადებს, რომ მიმდინარე წელს 15-მდე ტბის ლიცენზირებაა დაგეგმილი.

„ჩვენ ვაპირებთ დავიწყოთ საქართველოს ტბებზე თევზჭერის ლიცენზირება. ეს პროცესი ერთი პერიოდი შეფერხებული იყო, ჩვენ სხვადასხვა უწყებებთან ერთად ახალი მიდგომები ჩამოვაყალიბეთ. ფასის გაანგარიშებაში შემოვიტანეთ ისეთი კომპონენტი, როგორიც არის ტბის ფართობი, მისი პოტენციალი, იქ არსებული ინფრასტრუქტურა, ასევე ლიცენზიის გაცემის პერიოდი. ეს მოგვცემს საშუალებას ადეკვატური ფასის წარმოქმნის, რომელიც მეწარმესთვისაც მისაღები იქნება.

მას შემდეგ რაც ტბის ლიცენზიით გაცემა მოხდება, პირველ რიგში აღკვეთილი უნდა იყოს უკანონო თევზჭერა. აუცილებლად უნდა არსებობდეს თევზის სამეურნეო მართვის გეგმა, მინიმუმ 5 წლის ვადით, რომელიც განახლებადი იქნება.

ერთ-ერთი ტბა, რომელიც ამ პირობით გამოგვაქვს აუქციონზე არის ლევანის ტბა, რომელიც ახალქალაქის მუნიციპალიტეტის ტერიტორიაზე მდებარეობს და მისი ღირებულება 32 000 ლარია. ნებისმიერ დაინტერესებულ პირს ელექტრონულ აუქციონში მონაწილეობა შეეძლება, ინვესტორს უნდა ჰქონდეს მართვის გეგმა და თევზის მარაგი ლიცენზიის დასრულების შემდეგ არ უნდა იყოს იმაზე ნაკლები, ვიდრე ეს დღესაა“, - განაცხადა ალექსანდრე დევიძემ.
უკან დაბრუნება
1263ნახვა
ტოპ სიახლეები
იხილეთ მედია ზონა
ნახეთ ყველა სიახლე ნახეთ მეტი